មានហេតុផលជាច្រើនដែលញាំងអោយគេហទំព័របណ្តាញសង្គមមួយនេះមានប្រជា ប្រិយភាព និងទទួលបានជោគជ័យ។ Facebookគឺជាកន្លែងដែលផ្តល់ភាពសប្បាយរីករាយ និងជាពិភពដែលផ្តល់សេចក្តីសុខ។ វាជួយអោយអ្នកអាចរក្សាទំនាក់ទំនងជាមួយមិត្តភក្តិ បងប្អូនសាច់ញាតិ និងអាចរាប់អានមិត្តថ្មី ឬអ្នកខ្លះអាចរកសង្សារបានតាមគេហទំព័រនេះទៀតផង។ មិនតែជាគេហទំព័រ សម្រាប់ទំនាក់ទំនងប៉ុណ្ណោះ វាក៏ជាកន្លែងដែលអាចអោយអ្នកលែងហ្គេម រៀបចំព្រឹត្តិការណ៍ ផ្ញើរកាដូអេឡិចត្រូនិក ចិញ្ចឹមសត្វអេឡិចត្រូនិក បង្កើតក្រុមឬវេទិការពិភាក្សារ និងសកម្មភាពជាច្រើនទៀត។
មនុស្សត្រូវការអារម្មណ៍មួយដែលពពេញដោយតម្លៃ ហើយFacebook គឺជាកន្លែងដ៏ល្អប្រសើរដែលអាចអោយពួកគេបញ្ចេញ និងធ្វើចែករំលែកនូវចំនង់ចំនូលចិត្ត គំនិត និងជីវិតប្រចាំថ្ងៃរបស់គេ។ តែដោយសារតែប្រជាប្រិយភាពរបស់គេហទំព័របណ្តាញសង្គមមួយនេះ បានធ្វើអោយមនុស្សជាច្រើនក្នុងសកលលោកនេះមានការព្រួយបារម្ភអំពី ការចំណាយពេលវេលាច្រើនហួសហេតុនៅលើគេហទំព័រមួយនេះ ដែលការដាក់ឈ្មោះអោយថា ការញៀនFacebook (Facebook Addiction
Disorder)។
នៅពេលដែលអ្នកចំណាយពេលវេលាយ៉ាងច្រើនទៅលើវា អ្នកនឹងមិនសូវរវីរវល់មនុស្សដែលនៅជុំវិញខ្លួនអ្នក ហើយវាក៏មានន័យថា អ្នកចាប់ផ្តើមញៀននឹងFacebook ផងដែរ។
ខាងក្រោមនេះគឺជាអាការៈ នៃការញៀននឹងFacebook៖
- អ្នកក្រោកពីដំណេកពីព្រលឹម ហើយអ្វីដែលអ្នកធ្វើមុនគេគឺចូលទៅក្នុងគេហទំព័រFacebook
- អ្នកចំណាយពេលច្រើនជាង១ម៉ោងជាមួយនឹងFacebook
-អ្នកនិងបងប្អូនរបស់អ្នកមានការពិភាក្សារគ្នាតាមរយៈFacebook ខណៈពេលដែលនៅផ្ទះជាមួយគ្នា
- អ្នកមិនអាចឈប់គិតពីសកម្មភាពផ្សេងៗនៅលើFacebookដូចជាការធ្វើ បច្ចុប្បន្នកាលកម្ម នៅលើWallរបស់អ្នក និងការផ្តល់មតិទៅលើ Wall ឬរូបថតរបស់មិត្តអ្នកនៅពេលដែលអ្នកនៅក្រៅប្រព័ន្ធ(Offline)។
- អ្នកតែងតែធ្វើការពិនិត្យមើលថាតើមានអ្វីថ្មី រៀងរាល់១ម៉ោងម្តង។
- អ្នកតែងទន្ទឹងរង់ចាំពេលវេលាដើម្បីត្រឡប់ទៅផ្ទះវិញនៅពេលល្ងាច ដើម្បីត្រួតពិនិត្យមើលថាតើមានសកម្មភាពអ្វីខ្លះនៅFacebook របស់អ្នក។
- Wall របស់អ្នកពោពេញដោយមតិ និងកម្មវិធីផ្សេងៗដែលអ្នកទើបតែបានប្រើ
-អ្នកមិនអាចឈប់ចូលទៅក្នុងគេហទំព័រ បណ្តាញសង្គមនេះសូម្បីតែមួយថ្ងៃក៏ដោយ ហើយបើសិនជាអ្នកមិនអាចចូលទៅកាន់Facebookអ្នកនឹងមានអារម្មណ៍នៅ មិនស្រណុក។
- អ្នកចាត់ទុកFacebookសំខាន់ជាងការងារ និងជីវិតប្រចាំថ្ងៃរបស់អ្នក។
-ហើយជាចុងក្រោយ ថ្ងៃរបស់អ្នកបញ្ចប់ដោយការត្រួតពិនិត្យមើលFacebookជាលើកចុងក្រោយ និងសរសេរថា”រាត្រីសួស្តី”នៅលើWall របស់អ្នក។ នៅពេលខ្លះអ្នកនឹងភ្ញាក់ពីដំណេកទាំងកណ្តាលអធ្រាតដើម្បីពិនិត្យ មើលថាតើមានអ្នកណាតបនឹងសារ ”រាត្រីសួស្តី”របស់អ្នកដែរឬទេ។
ទោះបីជាការញៀននឹងFacebookមើលទៅគឺមិនមានគ្រោះថ្នាក់ក៏ដោយ ប៉ុន្តែវាអាចធ្វើអោយអ្នកប្រឈមមុខនឹងជម្ងឺផ្លូវចិត្ត និងបញ្ហាជីវិតប្រចាំថ្ងៃរបស់អ្នក។ប្រសិនបើអ្នកមានបញ្ហាខាងលើ នេះមែននោះ អ្នកគួរតែកែទម្លាប់នេះអោយកាន់តែឆាប់កាន់តែល្អ និងត្រូវចេះរៀបចំពេលវេលាអោយបានសមស្រប។
Source: Kumnit